談投資策略

投資一定要有自己套系統，岩岩開始就算抄人套系統都得，但最終都要研究出方向。所謂系統，我會形容為由好多rules組成，強逼自己一定要跟從既原則。無系統既人好容易唔夠信念，最後淪落到跌市出貨、摸頂入貨，成為散戶韭菜。

建立系統第一樣，先審視自己總資產，有幾多可以拎黎投資，有幾多生活應急錢(建議最少保留半年日常支出所需或者3個月左右月薪)。之後，再制定投資目標回報率，睇下自己本身每月可儲幾錢，如果你拎黎投資舊錢可以響2年內就儲到，即係個本唔夠大。我建議設定高回報既目標，例如一年20%以上，輸左都好快儲回。如果過百萬，目標定6%已經不錯。

第二，投資回報目標決定了適合你的投資工具。基本上要10%以上，都需要參與股票以及期權買賣。以上所指係美股期權，如果參與港股的話，應避免衍生金融工具，因為香港期權市場太細，買賣價經常出現超大差距甚至無人開價。而當組合過百萬就可以分配部分固定收益產品(一般大約4-8%左右)，例如債券、優先股、REITS，再加入適量指數股票型基金(ETF)，減低個股對組合影響。

第三，係資金分配。由於美股升得太勁，一直擔心有回調，所以我唔會100%滿倉，或者開孖展。我會保持20-30%加倉資金，俾自己走位。而市況波動時，選美國總統前，我更會調整至60-70%現金，期望低位入市。至於買入股票數目，應視乎本金分配，50萬以下可能頂多持有4-6隻股，例如我有50萬，諗住入5隻股，再設定一隻股最多可佔組合比例幾多，如40%，即係單一持股最多只能20萬，佢升超過組合既40%就要出d貨。至於，500萬以下頂多持有15-20隻股/債。

第四，分配入市注碼。就算我幾想入一隻股都唔會一次過入，一定要分段。例如，我有50萬，目標要買tsm去到我組合既40%，即係20萬，如升市時我會拆5注入市(即係每注4萬)，跌市時我會拆10注入市(即係每注2萬)，因爲大跌市時永遠唔知底部響邊，有機會岩岩先開始跌，反而升市可以乘風破浪，不用拆得太多注。每一注相距5%以內。

第五，設止蝕位/補倉位。由於嚴重虧損，會令購買力下降。例如股票跌10%，要升11%先返上岸。跌20%要升25%，跌30%要升43%！所以，要設止蝕位保持購買力，大部份人set 8%-15%，但我認為自己選股都優秀可以長揸，我會set20%，一旦跌超過20%，有信心就加碼令loss%下跌，如果已經無錢加碼一定要放。因為再下殺至30%loss，基本上已經救不回來要升43%，可能講緊要坐貨幾年。

最後保持耐心，等數錢。