疫苗對股市影響

上篇講到疫苗股BNTX既部署，而家講下疫苗對後市有咩啟示，由於疫苗面世普及最快要明年底，經濟復甦要下年年底財報先會反映。現階段炒左上去既舊經濟股(指地產、零售、能源、傳統工業、金融產業)，應該好快回落。響過去一年，人已經開始習慣新消費模式，新經濟股(互聯網金融、雲端、高科技產業、新能源)亦已經大升一年，有幸3月時入貨的話，應該都有50%-100%以上回報。現時回調少少實在不存在大跌一說，而且我好質疑疫情結束後是否所有舊經濟股都能回復當年勇。例如，能源、零售應該開始走下坡。

無可否認，受惠美國印錢，多左既購買力將會湧入資產市場，美國既地產市場同建築產業應該會迎黎一個小陽春。未來幾年應該類似2012年後既香港，美國樓價會爆發性增長，看好建築地產商DHI，綜合房地產封閉型基金RQI。當中RQI更屬穩陣投資，屬於cef既一種，每月派息，稅後年息大概5.8%，詳情請看Kano blog 介紹! 但今天並不是上述股票加倉既好時機，舊經濟股回調先慢慢考慮。

今日既主角係疫情受惠股，部份新經濟股(如Zoom)有機會再大跌，始終疫情完左之後，video開會亦會減少，可能得番跨國會議先用。另外TDOC係online睇醫生服務，客量相信都會減少。

但你諗下，疫情完結你會唔會唔打機先？雲端服務會唔會受影響？你就知道今日跌市尋寶要搵咩😎由於疫情受惠股大跌，無貨既朋友今天係加倉好時機，記住記住要分幾注分幾日入貨，諗賺錢之前要先諗輸錢既機會。

應該有聽過廢老巴菲特講過「別人恐懼我貪婪」吧!美股貪婪恐懼指數可以幫忙判斷市況是否過熱或超賣。暫時58距離我第一個警示70仲有好多距離，市況不算過熱，可判斷為無須減倉。