Day 7 Hungry Jack
Hungry Jack即係香港Burger King
佢個app真係不得了，成日抽中免費華堡餐同埋$2澳幣套餐
年中都救番唔少backpacker
Day1 抵達
到達悉尼機場，第一件事係拎紙巾出黎抹鼻涕。 雖然一早知道香港同澳洲天氣相反，但無諗到7月可以由30度變6度咁誇張，搞到病病地。 另一方面，響新加坡水機係咁飲係咁飲，黎到澳洲又買左成支spring water(中文叫...)，最後水土不服。。。 之後決定先住幾日YHA再搵屋。因為拎住寥寥可數既現金，所以唔撘火車唔撘的士，用2個鐘轉3次巴士，到達原本25分鐘就到既目的地Glebe！ 去到原本諗住訓3晚就算，點知reception哥哥話訓一星期就送無限上網。 心諗咁筍？就租左1星期，後來先知價錢比出面share house貴兩倍既青年旅舍，仲要係4人房呀。。。頂。。。 點知，入到房無人喎！唔理啦，機場訓得咁差，訓醒先講。一訓就訓到夜晚7點，起身見到對面碌架床有一個人。咦？係個鬼妹喎。我即刻同佢say左個hi，鍛煉下英文先。 咁之後點？你覺得會有咩發生？ 佢同我既交流就停留左第一句個Hi度。之後都仲有個Bye，佢第2朝就閃左。總共兩句。 7點幾，我就出去搵野食醫肚。不斷行啊行，唔知行左幾耐。終於搵到個food court，買左份收鋪前特價晚餐炒飯。由港元變澳元個下，都幾難調整心態，因為所有野都真係幾唔抵。 響一剎那，我眼泛淚光，明白到粒粒皆辛苦既道理，連平時唔食既雞皮都食哂。 明明我過黎想賺第一桶金，點解生活過得咁 兜踎... 返到宿舍，Google map發現竟然行左2公里去食個飯，再2公里行返黎。如果每餐行4公里來回，會否太過分？ 睇黎聽日要開始煮飯食
留言
張貼留言