Day2 整理生活

今日要把握時間出市中心處理銀行、電話卡之類。
所以一早就起身，已經係下午2點，發現對面床個人已經check out左。期待下次新roommate出現可以多2句對白。
由於機場訓左日，尋日又即刻訓，2日無沖涼，so sad。想沖發現無沐浴露同洗頭水供應，所以又要行2公里到大型超市Coles買野。見到大減價，即刻買左支$2洗頭水同$2沐浴露，仲有$2一袋5包營多撈面，好感動！
點知行幾步就見到雜貨outlet，超平，洗頭水$1...diuuuuuuu

4點半趕去澳洲銀行NAB開戶。全個分行得5個職員，但有4個香港人，另1個係大陸人。幫我開戶口既係個大陸人，岩岩係澳洲大學畢業。佢第一次處理海外人士開戶口，手忙腳亂，嚇到我無咩信心。好彩最後都整到，將我剩餘大部份既錢都放哂入卡。但我估唔到之後會發生災難性既慘劇：(
眨下眼，5點幾就天黑。晚餐方面，YHA今晚有個免費BBQ之夜，我緊係報名狂食。當晚上到天台，見到有好多外國人，分左兩批。一批係crazy既，一批係想靜靜地傾下計。我係第三批，想自己毒毒地食免費大餐
過程中發現左原來青年旅舍最多既唔係青年，而係好多60-70歲既老人。

**重點**
到了沖涼時間，好開心拎住新洗頭水同沐浴露出發。點知，買錯左支護髮素返黎！！！
結果今日眨下眼又hea左一日，仍未開始搵工同搵屋